Mozaikowe plesternaki a ornamenty po starym přikładźe kładli

Wojerecy (SiR/SN). Měšćanska štwórć wokoło Wojerowskeho dwórnišća je wot njedawna wo zajimawostku bohatša. Tam su minjeny štwórtk ponowjeny historiski chódnik při Dwórnišćowej aleji zjawnosći přepodali. Dźěła na 200 metrow dołhim wotrězku, kiž su z mozaikowymi plesternakami a ornamentami po historiskim přikładźe sporjedźeli, běchu nazymu tohole lěta zahajili.

„Předewzaće je so jara derje poradźiło. Móžeš jenož wobdźiwać, kak su twarscy dźěłaćerjo chódnik tak rjenje wuplestrowali“, rjekny wyši měšćanosta Torsten Ruban-Zeh (SPD). Po jeho słowach dyrbjachu při twarskich dźěłach něštožkuli wobkedźbować, wšako su chódnik sam kaž tež štomy podłu njeho jako pomnik zastopnjowane. Tak su šćežku trochu zwyšili, zo by wona před korjenjemi ­bliskich štomow lěpje škitana była. Kaž z měšćanskich podłožkow wuchadźa, bu pućik wokoło lěta 1905 natwarjeny.