Kulow (AK/SN). Wjacore twarske naprawy město Kulow w blišim času zwoprawdźa. Wotpowědne twarske nadawki je wuběrk měšćanskeje rady firmam přepodał. Wo tym informowaše nawoda twarskeho zarjada Stephen Rachel předwčerawšim na posedźenju měšćanskeje rady. „Jónu je to dołho wočakowane saněrowanje mosta při Koberec młynje w Kulowje. Smy nětko planowanske dźěła za nošnu konstrukciju do nadawka dali“, Rachel rozłoži. Nadawk we wobjimje něšto wjace hač 50 000 eurow přewozmje firma z Drježdźan.

Fasadu pěstowarnje na Bebelowej, kotraž je w nošerstwje Křesćansko-socialneho kubłanskeho skutka, chcedźa z ćopłotnej izolaciju wuhotować. Nadawk we wobjimje 95 000 eurow ma Kulowske předewzaće LMB zwoprawdźić. „Naprawa je nuznje trěbna“, tak Stephen Rachel, „dokelž je to hladajo na ćopłotnu izolaciju najšpatniša fasada města. Wona wobsteji hišće ze starych cyhelow a beto­nowych elementow z časa NDR.“ Třeći projekt je třěcha Salowskeho kulturneho domu. Ju ma Kulowska třěchikryjerska firma Schlegel & Koplanski za 59 000 eurow ponowić.