Wjele lět bě praksa Njeswačanskeje ­lěkarki dr. Jany Markoweje w rumnosćach nad tamnišej apoteku zaměstnjena. Wot dźensnišeho skutkuje wona w nowych rumnosćach, štož ma ­prěnjorjadnje cyle praktisku přičinu.

Njeswačidło (SN/MWj). Twarjenje před Njeswačanskej kupnicu při Hłownej dróze do směra na Wbohow znaja wobydlerjo zwjetša jako BHG. Dlěši čas bě tam wobchod za pisanske wěcy zaměstnjeny. Předewzaćelej ze wsy staj dom w zašłych měsacach dospołnje přetwariłoj. W nim nima jenož serbski frizer Tobias Hanuš swój salon. Nětko je w domje tohorunja powšitkownolěkarska praksa dr. Jany Markoweje. Dźensa rano dypkownje we wosmich je wona prěnich pacientow do nowych rumnosćow witała a při tym ­tójšto zbožopřećow přijimała.