Budyšin (SN/bš/bn). Pod hesłom „Spekulaciusowy spektakl“ wuhotowaše towarstwo Kamjentny dom prěni raz zhromadnje z Budyskimi Wjacławskimi wikami wosebity program za swójby. Předwčerawšim předstaji na žurli domu klankowe jewišćo Hellwig inscenaciju „Heimlichkeiten in Kasperhausen“. „Hudźbny spektakl k sobučinjenju“ poskićeše Frank Fröhlich małym a wulkim wopytowarjam. Ze swojim programom „Wrótny hodowny pjekar“ zapřiješe Drježdźanski gitarist publikum, kotryž potom z hłosom, rukomaj a/abo nohomaj jeho animaciji zahoriće sćěhowaše. Na wšelakorych městnach zaspěwa popowy chór Kamjentneho domu mjezynarodne hodowne spěwy, kajkež zahra tež jako swj. Mikławš kostimowany Wrócławski nawěžny trubjer Tadeusz ­Nestorowicz na trompeće a dalšich dujerskich instrumentach, na kotrychž móžachu so zajimcy tež sami wuspytać.