Wulkotny koncert hodownu naladu přisporjał
Róžant (JK/SN). Hač na poslednje městno wobsadźena bě Róžeńčanska hnadowna cyrkej na wčerawšim hodownym nyšporu, kotryž wuhotowa chór Lipa zhromadnje ze smyčkowym kwartetom a skupinu PoŠtyrjoch. Po lětomaj nanuzowaneje koronoweje přestawki žedźachu so mnozy zaso za wokřewjacej a zdobom hnujacej hodownej hudźbu. A wopytowarjo njebuchu přesłapjeni. Wulki dźěl serbskich hodownych twórbow a tajkich našich słowjanskich susodow zamó hodowne začuća dale sposrědkować a dopokaza znowa wuběrnu kwalitu spěwneho cyłka pod nawodom Jadwigi Kaulfürstoweje.
