Wojerecy (AK/SN). Po starym měsće chce město Wojerecy tež w nowym měsće energetiske saněrowanje zwoprawdźić. Za to je wjetšina čłonow měšćanskeje rady na swojim zašłym posedźenju integrowany energetiski koncept za modelowy kwartěr Łužiske naměsto wobzamknyła. Zarjadnistwo ma nětko nadawk, saněrowanski management zarjadować a so wo spěchowanske srědki prócować. Nošer projekta su Wojerowske zastaranske zawody (VBH). Pozadk je plan zwjazkoweho knježerstwa, po kotrymž ma Němska hač do lěta 2045 klimoneutralna być“, rozłoži projektowa managerka Simone Mindermann z Lipšćanskeje firmy, kotraž je koncept zdźěłała. Dokelž maja w měsće wšelaku architekturu, ma wona energetiske měšćanske saněrowanje za wosebite wužadanje.