Łazowska gmejna zhladuje na ćežke wužadanja w zašłym lěće
Łaz (AK/SN). 2022 bě lěto połne ćežkich wužadanjow, w kotrymž su při wšěm wjele zdokonjeli. Tole wuzběhuje wjesnjanosta Thomas Leberecht (CDU), jako wón zašłe lěto bilancuje.
Ćežišćo bě twar wopłóčkoweho kanala podłu zwjazkoweje dróhi B 96 we Wulkich Ždźarach. Tónle projekt zahajichu hižo w nalěću. Krótko do hód su třeći twarski wotrězk mjez Kulowskim a Rachlowskim pućom dotwarili, tak zo móža tam awta zaso po hłownej dróze jězdźić. Dalši wotrězk, hač ke kromje wsy do směra na Stróžu, ma bórze slědować. Potom B 96 znowa dospołnje zawru.
Zakónčiła je Łazowska gmejna loni saněrowanje Wulkoždźarowskeje zakładneje šule „Při Hórnikečanskim jězoru“. Po połdra lěće twarskeho časa móžachu šulerjo a wučerjo zaso do hłowneho twarjenja kubłanišća zaćahnyć. Při tej składnosći 60lětne wobstaće Wulkoždźarowskeje šule woswjećichu.