Budyšin (SN). Zemicy-Tumicy su přez mjezy Němskeje sławne za swoju tradiciju wudobywanja zornowca, wšako bě zornowc hižo w srjedźowěku požadana twaršćizna. W lěće 1845 pak dósta wón móhłrjec přez nóc nowu dimensiju: Za železnisku čaru Biskopicy–Budyšin měješe so 222 metrow dołhi a 17 metrow wysoki móst twarić. Blisko twarnišća załožichu tuž skału, hdźež hoberske mnóstwo kamjeni pačachu. 700 ludźi tu sčasami dźěłaše. Za połdra lěta bě impozantny móst, kaž jón dźensa znajemy, dotwarjeny.
Tehdy w Zemicach a Tumicach hišće Serbja bydlachu. Wučer a horliwy čłon Maćicy Serbskeje Jan Bohuwěr Mučink, kotryž bě 1845 šulu w Zemicach załožił, dźěći tež serbsce wučeše. Z nawalom cuzych dźěłaćerjow pak so kónčina doskónčnje přeněmči. Mučinka a jeho mnohostronski angažement – wón bě tež přirodowědnik, publicist a spisowaćel – sej w Zemicach dźensa hišće waža. Su dróhu we wsy po nim pomjenowali, a jeho row na pohrjebnišću gmejna swěru hlada.
