Brězowka (AK/SN). Tež w Dźěwinskej gmejnje je nowy plan šulskich busow problemy wotkrył. Na to skedźbni wjesnjanosta Sebastian Bertko na naprašowanje Brězowskeje staršiskeje iniciatiwy na minjenym posedźenju gmejnskeje rady. „Zamołwity je a problemy rjadować ma wokrjes. Gmejnje je wid policije wažny“, wuwjedźe Bertko.

Komuna zasadźuje so za wobmjezowanje spěšnosće wokoło Stareje šule na 30km/h. Trěbne postajenje za to hižo předleži. Bórze chcedźa wotpowědne wobchadne znamjenja připrawić. Z wobmjezowanjom spěšnosće ma so wěstota šulerkow a šulerjow w Brězowce zwyšić.

Staršiska iniciatiwa zasadźuje so za zachowanje busoweho zastanišća na Wjesnej dróze w Brězowce. Městnosć pak měli wutwarić. „Je ćma. Dźěći steja, kaž ‚kokoše na žerdźi‘. Nječuja so derje. Nimo toho faluje jasna pokazka ‚Kedźbu, dźěći‘“, měnitaj zastupjerjej staršiskeje iniciatiwy Janine Maßnick a Markus Güttler. ­Sebastian Bertko pokaza na přepytowanje policije a wuslědki tuteje. Za Wjesnu dróhu je wokrjes Zhorjelc zamołwity.