Raznu debatu su na wčerawšim posedźenju Budyskeje měšćanskeje rady naprašowanja radźićelow wubudźili. Předewšěm je šło wo wječork kiž je za 9. februar w tudyšej „Krónje“ planowany. Krótkodobnje dyrbješe zarjadowanje do baloweje žurle „K němskemu dubej“ we Wjazońcy přeńć.
Budyšin (CS/SN). Předmjet debaty bě zarjadowanje na temu „Krizy a jich šansy“ z Ernstom Wolffom, dr. Hansom Joachimom Maazom a moderatorom Alexom Quintom. Měšćanski radźićel Sieghard Albert (AfD) so za přičinu přepołoženja wobhoni. Wyši měšćanosta Karsten Vogt (CDU) jemu wotmołwi, zo běchu drje jednanja z Budyskej bydlenjotwarskej towaršnosću (BWG), mějićelku „Króny“, zrěčenje z přizjewjenjom pak njebu docpěte. Mějachu chutne pokiwy, zo móhło k mylenjam dóńć. Nimo toho hrozy městu strata imaga. Vogt skedźbni na jednanski porjad „Króny“. Tam rěka, zo měšćanska hala za politiske zarjadowanja njewobmjezowana k dispoziciji njeje. Jednaćelka BWG Kirsten Schönherr je w naležnosći pisomne kontrowersy dóstała. Su zwěsćili, zo njeby móžno było, za planowane zarjadowanje wěstotu zaručić.
