Zwonka šulskeho časa dźěćom nowe medije spřistupnjeja

Malešecy (MiR/SN). W Malešanskim dźěćacym dnjowym přebywanišću „Wódny muž“ su dźěći w prěnim prózdninskim tydźenju dwaj dnjej digitalnje po puću. „Zmóžnjamy swojim chowancam poskitki zwonka wšědneho dnja“, rjekny nawodnica pěstowarnje Borbora Kralowa. „Zo so z digitalnym swětom zaběramy, pak je prěni raz.“ Dźěći zeznaja na tableće hrajnu app wo wohnjowej woborje. Zdobom wužiwaja BOOKii-knihu z wotpowědnym wobsahom a BOOKii-pisak. Byrnjež app w němčinje předležała, je poskitk serbski. Wšako so w app njerěči. Hortowe dźěći pisaja skript za słuchohru a ju z pomocu BOOKii-pisaka resp. šmóratka nahrawaja.