Slepo (JoS/SN). ). „Kuzło wolijowych barbow“ rěka hesło jutrowneje wustajeńcy, kotraž je wot dźensnišeho w Slepjanskim Serbskim kulturnym centruje (SKC) přistupna. Zestajiła je ju wuměłča Heide­marie Goletz z Burga pola Magdeburga. Minjenu sobotu je wona swoju přehladku natwariła.

We Łužicy Heidemarie Goletz prěni raz wustaja. Zwisk do SKC je připadnje nastał. Internetnje pytaše wona za materialom za wustajenje jutrownych jejkow. Při tym je SKC pomhała. Jeje nawodnica Silwija Panošina bě wćipna, kotre jutrowne jejka 62lětna ma. Tak je spěšnje ideja wustajeńcy nastała.