Hižo stote zarjadowanje po swojim ­znowawotewrjenju poskići Kamjenska Lessingowa biblioteka swojim wopytowarjam minjenu srjedu. Prěni tydźenje noweje biblioteki běchu wuspěšne.

Kamjenc (SN/MiP). „Nowa měšćanska biblioteka w Kamjencu so dźeń a bóle na žiwe městno wuwiwa, do kotrehož ludźo rady přichadźeja, a to nic jenož wodnjo.“ To piše Marion Kutter, nawodnica knihownje, w nowinskej zdźělence. W prěnich štyrjoch měsacach su sobudźěłaćerjo biblioteki dohromady 867 wosobam wužiwarski wupokaz wupisali – dwójce telko kaž hewak w běhu cyłeho lěta. Něhdźe 40 000 ludźi je nowu biblioteku wopytało – to je trójce telko, kaž w samsnej dobje na starym městnje. Něhdźe połojca z nich je młódša hač 30 lět. Słónčne dźěle biblioteki za dźěći a swójby su runje tak frekwentowane, kaž kućik za młodźinu. Tež šulerjo Lessingoweho gymnazija tu rady přebywaja, zo bychu so zetkawali, zwučowali abo so wočerstwili – wšako maja tu přez šulsku mensu direktny přistup.