Njebjelčanscy gmejnscy radźićeljo steja před nadawkami, kotrež jich móžnosće přesahuja. Woni maja nastajić hospodarski plan, kotryž zakonskim žadanjam wotpowěduje. To pak je ćežko.

Njebjelčicy (JK/SN). Lisćina nadawkow a trěbnych dźěłow Njebjelčanskeje gmejny, kotruž wjesnjanosta André Bulank (njestronjan) na wčerawšim posedźenju gmejnskeje rady předstaji, je jara dołha. Radźićeljo wzachu to na wědomje a dowidźa, zo su naličene dźěła a nadawki trěbne a wažne, ale tuchwilu hospodarske połoženje gmejny prosće njedowoli, so tajkim nadawkam wěnować. Najwažniše je, nastajić tajki hospodarski plan za tute lěto, zo wokrjes gmejnje njenapołoži wosebite hospodarsko-strukturne naprawy. Tomu chce gmejna zadźěwać.