Wojerecy (SiR/SN). Před wjace hač 20 lětami je Matthias Brauer swój powołanski puć jako sobudźěłaćer Wojerowskeje Łužiskeje kupjele nastupił. Před nimale dokładnje třomi lětami je wón wjednistwo zarjadnišća přewzał. Nětko změje wón přetwar a modernizowanje kupjele sobu na starosći, štož je dźakowano 22,5 milionam euro spěchowanja z hornca za změnu strukturow móžno. Hač do oktobra přichodneho lěta ma kupjel přidatny 25 metrow dołhi płuwanski basenk dóstać, nimo toho tajkej za wodowu gymnastiku a za babyjowe płuwanje. Dale nastanje nowy zachod a tež wonkowne připrawy so přetwarja, tak zo budźe wjace cyłolětnych poskitkow móžnych. „Naprašowanje za tajkimi poskitkami je dźeń a wjetše. Trěbne je modernizowanje tež za lěpše dźěłowe wuměnjenja našich sobudźěłaćerjow“, Matthias Brauer rjekny.