Walkowanje prěni termin w nalěću

srjeda, 19. apryla 2023
artikl hódnoćić
(0 )
Tójšto ludźi bě minjenu njedźelu w Nowym Měsće nad Sprjewju na walkowanje jutrownych jejkow přišło.  Foto: Jost Schmidtchen Tójšto ludźi bě minjenu njedźelu w Nowym Měsće nad Sprjewju na walkowanje jutrownych jejkow přišło. Foto: Jost Schmidtchen

Nowe Město (JoS/SN). Wot srjedź 1990tych lět organizuje domizniske towarstwo w Nowym Měsće nad Sprjewju tydźeń po jutrach za wjesne dźěći walkowanje jutrownych jejkow. Lětsa wšak mějachu wobmyslenja, hač budu zarjadowanje wjedra dla scyła přewjesć móc. Najpozdźišo njedźelu popołdnju pak so wopokaza, zo běchu wone njetrjebawše. Najebać zymnych temperaturow bě wjele wobydlerjow wšěch starobnych skupin přišło. „Ludźo chcedźa prosće zaso won“, rjekny předsyda domizniskeho towarstwa Stefan Krawc. Někotre dźěći běchu ze swojimi pisanymi jejkami hižo dočasa přišli, zo móhli skónčnje započeć walkować. Žony z towarstwa w swojej serbskej drasće na to kedźbowachu, zo wšitcy regule dodźerža a nichtó wjace jeji nje­dóstanje, hač je při walkowanju trjechił. Dokelž běchu žony z towarstwa tykanc pjekli a druzy kołbaski a steaki grilowachu, měješe zarjadowanje charakter ludoweho swjedźenja.

wozjewjene w: Łužica
Prošu přizjewće so, chceće-li komentar podać

nowostki LND