Po jutrownych podawkach w Budyšinje hotuje so sprjewine město na dalši wulki wjeršk. Budyske nalěćo skića lětsa znowa wjele zabawy a tež serbskeje kultury.
Budyšin (CS/SN). We wobłuku lětušeho Budyskeho nalěća, kotrež ma so wot 19. do 21. meje wotměć, změja na třoch jewišćach drje za kóždy hudźbny słód něšto přihotowane. Lubowarjo šlagra přińdu runje tak na swoje kóšty kaž fanojo elektroniskeje hudźby. Ćežišćo je lětsa brass, potajkim dujerska hudźba, zdźělichu organizatorojo předwčerawšim na nowinskej rozmołwje. Dohromady wustupi 27 kapałow, k tomu jednotliwcy a hudźbne dwójki. Cyłkownje stara so 580 sobuskutkowacych wo zabawu Budyšanow a jich hosći.
