Chce dom zjawnosći spřistupnić

štwórtk, 11. meje 2023
artikl hódnoćić
(1 )
33lětny Richard Paška je nowy nawoda Smječkečanskeho domu swjateho Jana.  Foto: Marian Wjeńka 33lětny Richard Paška je nowy nawoda Smječkečanskeho domu swjateho Jana. Foto: Marian Wjeńka

Wot srjedź apryla je Richard Paška z Chrósćic nawoda Smječkečanskeho Domu swjateho Jana a naslěduje tak Marka Klimana. Z młodym mužom smy so tele dny na jeho nowym ­dźěłowym městnje zetkali.

Smječkecy (SN/MWj). W foyeru Smječ­kečanskeho Domu swj. Jana sedźi starši muž a z barbjenčkami moluje. Młody muž w módrej košli a jeansach so z nim rozmołwja a jeho wobrazy chwali. W štwórtym tydźenju swojeho zastojnstwa jako nawoda domu za duchownje zbrašenych a psychisce chorych Richard Paška swojich wobydlerjow a jich wosebitosće hižo derje znaje.

33lětny pochadźa z Kanec a bydli w Chrósćicach. Z mandźelskej Dianu, młodej pjekarskej mišterku ze Zahrodnikec swójby, je sej pola přichodneju ­staršeju bydlenje wutwarił. Swójba wočakuje bórze třeće dźěćo. Po wuchodźenju srjedźneje šule w Pančicach-Kukowje je Richard Paška w Kamjenskej chorowni powołanje hladarja chorych nawuknył. Dale je po dalekubłanju hladanski wob­łuk operaciskeho wotrjada nawjedował a w tym času studij hladanskeho managementa w Drježdźanach zahajił, kotryž chce za lěto wotzamknyć.

wozjewjene w: Łužica
Prošu přizjewće so, chceće-li komentar podać

nowostki LND