Pančicy-Kukow (SN/MWj). Tradicionalny nalětni koncert na zahrodźe klóštra Marijineje hwězdy w Pančicach-Kukowje je so předwčerawšim znowa jako wopytowarski magnet wopokazał. Wopytowarjo z wokolnych wsow a z dalšich kónčin dožiwichu wokřewjacu połdra hodźinku ze znatymi melodijemi, nowosćemi a překwapjenkami.
Judith Pjetašec a Jan Rjeda připowědźištaj na spočatku sep lubosćinskich pěsnjow, kotrež njezaspěwa jenož chór pod nawodom Jadwigi Kaulfürstoweje, ale tež Daniel Wałda jako solist „Lubki lilije“. Na Dnju maćerje njesmědźeše wězo Měrćina Weclichowa „Maći luba“ pobrachować. Premjernje zaklinča spěw „Dźeržiš so mje“, za kotryž staj Werner Meškank tekst a Dietmar Kreisel melodiju stworiłoj. Fabian Kaulfürst měješe chórowu sadźbu na starosći. Dalši solist bě Marko Paška z „A ženje ja njejsym“. Nora Birkhofenec přednjese baseń Moniki Kochoweje „W klóšterskej dolinje“. Spěwarki a spěwarjow na klawěrje přewodźał je Jan Brězan.