Pančicy-Kukow (SN/MWj). Mjeztym zo sej mužojo a dawno tež swójby na swjedźenju Božeho spěća na zajimawe městna wuleća, činja to čłonojo Domowinskeje skupiny Pančicy-Kukow hižo něšto lět dźeń do toho. Tak pobychu minjene lěta zdźěla z kolesami mjez druhim w ratarskim muzeju w Konjecach, w drastowym fundusu w Nowej Jaseńcy a druhdźe. Předwčerawšim dojědźechu sej do Hornjeho Wujězda, zo bychu tamnišu awtodróhowu cyrkej bliže zeznali. Horstka čłonow nastaji zo znowa z kolesami na puć a sej tak swoju blišu domiznu zaso trochu bóle wotkry.