Budyšin (CS/SN). Wo Němcach so praji, zo su swětowi mištrojo wopominanja. Ale je to docyła wěrno? Tele prašenje staji referent najnowšeho zarjadowanja w rjedźe „Budyske narěče“ minjeny pjatk wječor w Budyskej tachantskej cyrkwi. Profesor dr. Christian Wagner je direktor Załožby Buchenwaldskeho wopomnišća a rěčeše k temje „Ze stawiznow wuknyć“. Hladajo na kulturu wopominanja, kiž w Němskeje pěstuja, ma wón njepřijomne začuća. Dopominanje na złóstnistwa nacionalsocializma je mjeztym ritualizowane a z wopačnym patosom zwjazane. Na róčnicach wopominanje kaž z monstrancu noša, wón rjekny. Tola wopominać móže čłowjek jenož, štož je sam dožiwił. Hdyž 16lětnych ze swojim wašnjom moralisce napjateje wopominanskeje kultury konfrontujemy, jich prosće přežadamy, bě sej Wagner wěsty.