400 ludźi při Hórčanskim sportnišću festiwal KrassBrass dožiwiło

Hórki (SN/MWj). Hórčanske sportnišćo njebě sobotu jeno start a cil lětušeho „Slaviamarscha“, ale tež městnosć dujerskeho festiwala KrassBrass. Štyri kapały starachu so wot popołdnja hač do nocy wo dujersku hudźbu, kotraž bě za serbske wuši na jednym boku cyle tradicionalna, na tamnym pak njezwučena, dokelž ju w tej formje lědma słyšiš. Něhdźe 400 wopytowarjow organizatorojo wokoło Symana Hejduški, Fabiana Hejduški a Jakuba Langi w Hórkach zličichu. Mnozy su so potajkim mjenje abo bóle spontanje rozsudźili, sej na festiwal dojěć, přetož w předpředani běchu něhdźe sto zastupnych lisćikow předali.