Symjo ječmjenja ma čiste być

štwórtk, 15. junija 2023
artikl hódnoćić
(0 )
Wuměnkarka Renate Gatner je tele dny na łužiskich honach widźeć, kak so wo čistosć žita na polach stara.  Foto: Milenka Rječcyna Wuměnkarka Renate Gatner je tele dny na łužiskich honach widźeć, kak so wo čistosć žita na polach stara. Foto: Milenka Rječcyna

Bolborcy (SN/MiR). Žitnišća překwapja tuchwilu we wšelkich barbach, su zelene abo tež hižo nažołć barbjene. Tež w Bolborcach so barba ječmjenja wšědnje měnja. Na polu rosće družina Fascination, na čož taflička, kotraž je něhdźe dźesać metrow wot mjezy dróhi wosrjedź pola nastajena, pokazuje.

W ječmjenišću steji žona a wobhladuje sej jeho wonkowny wobraz. „Chodźu po kromje pola a na čarach, kotrež ratarske mašiny wujězdźa. Wšitke rostliny, kotrež tam njesłušeja, mam wućahnyć“, powěda Renate Gatner, „zorno ma čiste być, hdyž so žito młóći. Wšako so wone ratarjam za plahowanje w přichodnym lěće předawa.“ Ručež sobudźěłaćerjo Lejnjanskeho Hentzschelec předewzaća za plahowanje symjenja na syčomłóćawach přijědu, so wone žněje, po tym we wulkich halach składuje a schnyje, prjedy hač so měch po měchu předawa. Fascination pak njeje jenička družina ječmjenja, kotrež pola Hentzschelec plahuja. Na druhich honach dalše družiny rostu. Přidatnje přećahuje Renate Gatner tež cokorowu rěpu.

wozjewjene w: Łužica
Prošu přizjewće so, chceće-li komentar podać

nowostki LND