W Kulowskej kupjeli stej wobaj prózdninskej kursaj wuknihowanej

Kulow (AK/SN). Z nadutymaj polstromaj na rukomaj Mila, Tilda, Alwin, Brian a Joshua prěnje metry płuwaja a hladaja ke kromje basenka. „Ruce dołhe činić, na wodźe płuwać a k tomu noze pohibować“, žada sej płuwanski mišter Uwe Mickel. W prózdninskim płuwanskim kursu w Kulowskej lěsnej kupjeli wón w třoch skupinach z dohromady 15 wobdźělnikami trenuje. Wot lěta 2001 wón kóžde lěto dwaj intensiwnej kursaj za dźěći organizuje. Kóždy traje dźesać dnjow.

„Sym tu sam płuwać nawuknył“, 51lětny powěda. „Dźensa jenož to dale wjedu, štož za čas NDR tu hižo mějachmy.“ Najmłódši dyrbja najprjedy we wodźe stać. Na to so woni na wodu połoža a so wotstorkuja. Jako prěnje nawuknu noze wužiwać, hakle potom ruce. Uwe Mickel kedźbuje na čistu techniku. „Płuwać njeje padlowanje, ale pohiby rukow a nohow elegantnje zwjazać“, wón rozłoži. ­Najmłódši zakónča kurs z wotzamknjenjom „Mórski konik“. Srjedźna skupina prócuje so wo płuwanske znamješko w bronzy, skupina wjetšich wo znamješko w slěbru.