Po rozpušćenju hudźbneho cyłka w lěće 2016 jón nětko wožiwja

Narć (SiR/SN). Atmosfera je wutrobna a wuprudźa něšto noweho a zdobom něšto znateho. Skupina angažowanych hobbyjowych hudźbnikow, wobstejaca z dujerjow a bubnarjow, je so na sportnišću w Narću k zwučowanju zetkała. Raz, dwaj, tři ... a hižo zaklinči fanfarowe solo, tomu slěduje bubon. Skónčnje něchtó ze swójskich rjadow přikleskuje.

Štyrilětna Edda „wojuje“ na kromje sportnišća z pasom swojeho małeho bubona. Jako najmłódša w skupinje je wona tule swoju premjeru při prěnim wustupje hudźbneje skupiny dožiwiła. To bě runje lětsa na chodojtypalenju. Tón dźeń je nowy Wojerowski fanfarowy ćah prěni raz zahudźił, po tym zo bě so 2016 rozpušćił. Kónc apryla chcyše iniciatiwna skupina znowa pospytać, hač móža hromadźe hrać. A pospyt je so radźił.