Rallye we Łužiskim centeru přeprošuje předewšěm swójby z dźěćimi
Wojerecy (AK/SN). We Wojerowskim Łužiskim centeru njemóžeš jenož nakupować, ale wot najnowšeho tež Krabata, lutki, připołdnicu a dalše bajowe postawy hrajkajo zeznać. Tam maja nětko wosebitu dožiwjensku rallye za swójby. „Nam je wažne, zo je poskitk analogny a nic digitalny. Naš zaměr je, zo kupcy dlěje pola nas wostanu“, praji centerowa managerka Madeleine Matschke. Rallye sobu wuwiła je sobudźěłaćerka techniskeho wobłuka Łužiskeho centera Martina Drabe. Podobnej poskitkaj matej so lětsa nazymu a spočatk 2027 přidružić a zaběratej so potom z łužiskej jězorinu a z bywšim łužiskim brunicowym rewěrom.
