Nowa wosebita wustajeńca wěnuje so 150lětnym stawiznam železnicy

Łaz (AK/SN). Figurina šafnerki wopytowarja přećelnje wita. Wokoło njeje su tafle a dźěle signalowych připrawow wustajene. Ćišćak za jězdźenki dopomina na wšědny dźeń na bywšim Łazowskim dwórnišću. „Chcemy stawizny tak pokazać, zo su zrozumliwe. Staršim wobydlerjam su to dopomnjenki, nowšim skerje nastorki“, praji Reinhardt Schneider z předsydstwa spěchowanskeho towarstwa Domu Zejlerja a Smolerja wo nowej wosebitej wustajeńcy „150 lět železnica we Łazu“. Jutře, pjatk, přehladku we 18 hodź. wotewru.

„Podłu železniskeje čary Wojerecy – Kohlfurt so lětsa stajnje zaso na jeje nastaće před 150 lětami dopomina“, praji Reinhardt Schneider. Mjez druhim přewjedźechu we Wojerecach dwórnišćowy swjedźeń. Nowa wustajeńca we Łazu swójske dopomnjenki přida, wšako běchu so tu kolijow dla stajnje zaso dróhi, puće a mosty změnili. Tež železnisku čaru su wjacore razy přepołožili.