Zo so mjez ludźimi druhdy blady šěrja, je čłowjeske. Často so wukopa, zo na nich scyła ničo njeje. Tajki pad je runje wobydlerjow we Łazu zaběrał. Nětko je tež tam wěste, zo je so jenož wo blady jednało.

Łaz (AK/SN). Kupnica Penny „Při Slěbornym jězoru“ we Łazu dale wobsteji. To wobkrućitaj wobsedźer ležownosće Paul Weiland a předewzaće Penny na naprašowanje. „Jedna so tu jeničce wo blady“, podšmórnje Anja Schwerdtfeger, sobudźěłaćerka jednaćelstwa za wuchodny region pola Penny w Teltowje. „Zawrjenje wotnožki Penny we Łazu kónc lěta 2023 njeplanujemy.“

Podobnje wupraji so Paul Weiland. Wón je senior-jednaćel zawoda za přirodne kamjenje Weiland w Bad Homburgu z wotnožku we Wojerecach. Firmje słuša we Łazu ležownosć, kotraž saha wot bywšeho wjesneho ambulatorija (nětko Balandtec ergoterapija) hač k předawanišću aziskich zakuskow a k twarskemu kompleksej kupnicy. „Wotnajenske zrěčenje z Penny we Łazu definitiwnje dale wobsteji“, Paul Weiland přilubja. „W přichodnymaj lětomaj ma so tam dale ponowić.“