Pytaja za kmanym pućom za šulerjow ze zakładneje šule do horta

Rakecy (JK/SN). Na minjene posedźenje Rakečanskeje gmejnskeje rady bě tež nahladna skupina staršich přichwatała, kotrychž dźěći do zakładneje šule chodźa. Woni mějachu wosebitu próstwu na radźićelow a gmejnu. Dotal běchu pěstowarki a sobudźěłaćerjo horta šulerjow stajnje wot šule wotewzali a do horta w pěstowarni přewodźeli a tež zaso wróćo do šule. Štóž Rakečanske wobstejnosće znaje, wě, zo je to poměrnje daloki a zdźěla tež strašny puć.

Nětko pak pěstowarnja a hort tutu posłužbu hižo njeposkićitej a dźěći dyrbja same ze šule do horta a zaso wróćo hić. To je staršim jara njewěste, dokelž dyrbja dźěći mjez druhim zwjazkowu dróhu B 96 přeprěčić. Přez tutu dróhu, po kotrejž so wulki wobchad bjez přestaća hiba, drje wjedźe přechod za pěškow z amplu, ale rjadowanje ample njewotpowěduje wěstotnym žadanjam a wuměnjenjam dźěći. Čas za přeprěčenje dróhi je překrótki a njezaruča z tym wěsty puć na druhi bok.