Njeswačanska gmejnska rada wažne wobzamknjenje cofnyć dyrbjała
Njeswačidło (JK/SN). Hižo w juliju bě Njeswačanska gmejnska rada wobzamknyła, dale wjesć resp. wobnowić zrěčenje k zastaranju zakładneje šule a sportownje z ćopłotu. Tehdy bě po dlěšej, zdźěla kontrowersnej diskusiji k wobzamknjenju a pozdźišemu zrěčenju dóšło. Za produkciju ćopłoty měješe so přewažnje drjewo zasadźować, kotrež měješe so z bliskich lěsow dodawać.
Na njedawnym posedźenju radźićeljo mjenowane wobzamknjenje z julija zaso cofnychu. Pozadk bě pokiw prawniskeho dohladowanskeho zarjada Budyskeho wokrjesa. Tón bě dóstał wjacore dopisy z Njeswačanskeje gmejny, w kotrychž na pozdatne negatiwne wuskutki mjenowaneho zrěčenja pokazachu. Dopisowar wopodstatni wopačnosć zrěčenja z falowacym drjewom a z nic efektiwnym tepjenjom.
