Chrósćicy (SN/MiR). Na rejowanje pój a do rejowanja so zahladaj! To znajmjeńša přeja sej Wudworscy, to rěka čłonojo Serbskeho folklorneho ansambla Wu­dwor (SFAW). Tuž přeprošuja na dźěłarničku reje. Młodźi rejowarjo a młode ­rejowarki abo ći, kotřiž chcedźa cyle jednorje přitomni być, hdyž Wudworscy ­trenuja, druhim wjeselo wobradźeja ­a zhromadnje swjeća, su na dźěłarničku rejowanja witani. Ta wotměwa so jutře, 28. oktobra, a tydźeń na to, 4. nowembra, stajnje w 15.30 hodź. w Chróšćanskej „Jednoće“. Jeničke wuměnjenje: Holcy a hólcy maja znajmjeńša dwanaće lět stare być. A derje je, hdyž sej črije zapakuja, w kotrychž móža derje sportować a rejować. Trening přewjedujetaj młodostnaj, Sara Łušćanskec a Vincenc Kilank, kotrajž hižo dlěje pola Wudworskich rejujetaj a zwučowanja nawjedujetaj. Předsyda SFAW Błažij Handrik rjekny: „W srjedźišću dźěłarnički steji rejowanje a to bjez přehnawanja.“ A na zajimcow so wobroćejo wón rjekny: „Přinjesće sej dobru naladu sobu a budźće wćipni!“