Njebjelčanska gmejna steji před wulkimi wužadanjemi
Njebjelčicy (JK/SN). W swojich informacijach za gmejnskich radźićelow a wobydlerjow wěnowaše so Njebjelčanski wjesnjanosta André Bulank (njestronjan) na wčerawšim posedźenju tamnišeje gmejnskeje rady mjez druhim financam gmejny. Tute pokazuja z tuchwilu dobrymi 450 000 eurami dosć spokojacy staw, z kotrymž hodźi so tójšto nadawkow gmejny spjelnić. Wulki dźěl pjenjez pak budźe gmejna dyrbjeć za to nałožować, hišće wobstejace žadanja a zličbowanki zapłaćić. Za to budźe něhdźe 200 000 eurow trěbnych. Kónc lěta drje změje gmejna čornu ličbu pod smužku.
W přichodnych lětach pak tomu hižo tak njebudźe. Po aktualnej analyzy hospodarskich wuměnjenjow gmejny a kalkulaciji přichodnych wudawkow kaž tež dochodow, je komornica gmejny za přichodne lěta, hač do lěta 2027, stajny minus na kóncu lěta wuličiła a wěsćiła. Falowace dochody z přemysłoweho dawka a stupace wudawki su za tule situaciju hłowna přičina. Tak budźe gmejna na wyše klučowe připokazanki wokrjesa připokazana, na kotrež so gmejna we wulkej měrje nadźija.