Worklečanska gmejnska rada so wo aktualnym stawje informowała

Worklecy (SN/MiR). Aktualny staw hospodarskeho wuwića Worklečanskeje gmejny běše jedne ćežišćo wuradźowanja gmejnskeje rady, zašły štwórtk wječor na tamnišej šuli „Michał Hórnik“. Wjesnjanosta Clemens Poldrack (njestronjan) wuwjedźe: „Předstajeny mjezystaw hospodarskeho plana z 21. septembra 2023 pokazuje, zo njejsmy wšitke předwidźane srědki přetrjebali. To nastupa předewšěm kóšty za personal w dźěćacym dnjowym přebywanišću w nošerstwje gmejny.“ Dokelž njejsu wotpowědnu ličbu kubłarkow a kubłarjow namakali, njejsu zaplano­wanu sumu pjenjez nałožować dyrbjeli. Hišće lětsa, najpozdźišo spočatk noweho lěta, změja nowu fachowu móc w kruhu kubłarjow a kubłarkow. Tuchwilu hišće w maćernym lěće přebywaca kolegina so bórze nawróći.