Kittnerec swójba w Hóznicy (Petershain) łóji hižo mnohe lěta ryby. Lětsa je to 32. raz. Tójšto ludźi přichwata, zo by sej čerstweje ryby nakupiło abo sej ju na městnje zesłodźeć dało.
Hóznica (JoS/SN). W hatowym předewzaću Kittner je jasne, zo chcedźa tež klětu ryby plahować a na předań poskićeć. Mějićel Armin Kittner so ćežow njeboji. Hačrunjež někotryžkuli susod w Hornjołužiskej hatnej krajinje hižo w rybarstwje njedźěła – wón wótku do žita njećisnje. Dopokaz toho běše njedawny 32. rybarski swjedźeń při Hrodowym haće w Hóznicy. Tón běše za předewzaće same, za sobudźěłaćerjow kaž tež za tysacy wopytowarjow rjany nazymski wjeršk. Byrnjež so rano dešćowało – so poněčim předrěwace słónčko wulku syłu ludźi přiwabi.
