Budyšin (SN/MiR). Wikowanje z imobilijemi je naročna naležnosć. Tomu je wosebje tak, maš-li w tutym wobłuku dosć poskitka a runje telko naprašowanjow. W poslednim času su ratarske płoniny wulce požadane. To zwěsća tež serbski imobilijowy makler Jan Hórnik hladajo na swoju přichodnu awkciju ležownosćow. Ze swojim předewzaćom je wón mjeztym tež w financnej metropoli Němskeje, w Frankobrodźe nad Mohanom aktiwny. Ćežišćo wikowanja pak je nadal we Łužicy. Na to pokazuja tež poskitki w aktualnej ćišćanej brošurce, kotraž informuje wo přichodnej awkciji imobilijow a ležownosćow, mjez kotrymiž su tež pola, lěsy a hona. Mjez druhim namaka zajimc ratarske płoniny we wuchodnej Sakskej, kaž njedaloko Wósporka abo blisko Grodka. 21 hektarow, polo, lěs a łuka su tež w kónčinach sewjernje Budyšina na předań. Chójnowy lěs na přikład móhł być zajimawy za tych, kotřiž trjebaja drjewo abo kotřiž chcedźa cyle swójski kónčk swěta za wotpočowanje měć. Při Hórnikečanskim jězoru je tajki na předań.