Radwor (SN/MkWj). Planowanske dźěła za nowy hort Radworskeje šule móža so započeć. Tole wobzamknychu čłonojo Radworskeje gmejnskeje rady na swojim wčerawšim posedźenju a přepodachu wotpowědny nadawk planowanskemu běrowej, kiž bě wupisanje po směrnicach EU dobył. Radźićeljo běchu so z naročnym předewzaćom na wosebitej klawsurje zaběrali. Gmejnje je wažne, wjesnjanostka Madelaine Rentsch potwjerdźi, zo ma wobšěrne prawo sobuskutkowanja a sobupostajowanja.

Runje tute prawo bě tež tema wobšěrneje diskusije wo skerje pódlanskim prašenju: W Kamjenej ma nastać nowe busowe zastanišćo. Wčera su twarski nadawk firmje přepodali, kotraž bě so při zjawnym wupisanju přesadźiła – dokelž bě najtuńši poskitk zapodała. Po płaćiwych směrnicach dyrbi gmejna tutej firmje nadawk přepodać, hač chce abo nic. „Čehodla scyła hišće wothłosujemy, hdyž dyrbimy tak a tak najtuńšeho wzać. Wo poskitkach druhich firmow pak njesměmy ani zjawnje rěčeć“, bě jedne z kritiskich prašenjow.