Budyšin (CS/SN). Něhdźe 116 milionow eurow je swobodny stat Sakska wot lěta 1991 nałožił, zo by Budyski „wustaw za přesadźenje justicneho wusuda čo. 1“, kiž mjenuja ludźo „žołtu bědu“, ponowił. Nětko wudawaja hišće raz 17,7 milionow eurow. Narunujo technisce zestarjenu kuchnju ma tam nowotwar z wjace hač 1 400 kwadratnymi metrami płoniny nastać. Po zahajenju twarskich dźěłow 2022 je nětko połčas na twarnišću. Hruby twar je hotowy, tak zo móžachu tam minjeny pjatk zběhanku woswjećić. Po dotwarje w lěće 2025 ma nowa wulkokuchnja optimalne wotběhi na dobro jatych a přistajenych zaručić. Wukubłanska kuchnja skići nimo toho 20 jatym móžnosć, so na kucharja abo pinčnika wukubłać dać. To ma zakład dobreho zarjadowanja jatych do towaršnosće być, wšako za lu­dźimi z tajkim powołanjom nuznje py­taja. Za přistajenych nastanje jědźernja z 50 městnami. W kuchni móža wšědnje ně­hdźe 760 jědźow za jatych, přistajenych a hosći zwarić.