Budyšin (SN). We wubědźowanju „Do srjedźizny! (Ab in die Mitte!) City-ofensiwa Sakska je město Budyšin zašły tydźeń myto „Centrum kćěje“ přijało. Na swjatočnosći k spožčenju wosebiteho myta w Mišnjanskim dźiwadle wobdźělichu so měšćanosta dr. Robert Böhmer, zamołwita za spěchowanje hospodarstwa Doreen-Charlotte Hantschke a managerka za nutřkowne město Annett Scholz-Michalowski. Pjenjezy myta chcedźa zamołwići klětu za wosadźenje Budyskeho Póštoweho naměsta z rostlinami wužiwać. Barbne blečki nimaja jeničce naměsto a dróhi pisanić, ale witaja tež wopytowarja města na přijomne wašnje. Měšćanosta dr. Böhmer radowaše so při přepodaću myta nad lóštnej plaketu znateho Lipšćanskeho wuměłca Michaela Fischera-Arta a wězo tež nad mytom samym. „Z tutym počesćowanjom móžemy wjeselo nad přirodu bóle do fokusa sunyć. Z kwětkowymi aranžementami na dobro pčołkow postaramy so tež wo wjace družin flory a fawny w zjawnym rumje“, rjekny Böhmer.