Hodowny štom, darjeny wot Walterec swójby z Hornjeje Kiny, mjeztym na Budyskim Hłownym torhošću steji a budźi wjeselo na lětuše Wjacławske wiki. Tež organizatorojo so wjesela, zo su wšitke přihoty sčasom wotzamknjene.
Budyšin (CS/SN). Kaž wyši měšćanosta Karsten Vogt (CDU) wutoru na nowinskej rozmołwje zdźěli, změja na jewišću pódla hodowneho štoma tež tónraz zaso adwentny kalender, kiž dźěći z hodownym jandźelom wšědnje w 15 hodź. wočinja. Nimo toho organizowachu lětsa žiwy adwentny kalender. Měšćanska managerka Annett Scholz-Michalowski je 24 wikowarjow nadešła, kotřiž wot 1. hač do 24. decembra w swojim wobchodźe wosebitu akciju poskića.
