Budyšin (SN/MWj). Wot minjeneho kónca tydźenja hač do 22. decembra wudźěleja w Budyskim wokrjesu wotpadkowu protyku za lěto 2024. Protyka ma runje tak kaž w zašłym lěće format wokrjesneho žurnala „Hdys a hdys“. Wobydlerjo měli potajkim trochu dokładnišo hladać, prjedy hač swoje stare nowiny wotbudu. Mjez nimi móhła snano tež wotpadkowa protyka być, kaž Budyski krajnoradny ­zarjad informuje.

W protyce zapřijate su zaso terminy wotwožowanja jednotliwych wotpadkowych sudobjow za wšitke města a gmejny wokrjesa. Tele terminy su kruće zapisane a so hižo njezměnja. Tež swjate dny su wobkedźbowane. Štóž tajki termin skomdźi, nima hižo šansu, zo jeho wotpadkowe sudobje dodatnje wuprózdnja. Nimo toho su w protyce zapřijate pokiwy, kak najlěpje wotpadki dźěliš, powšitkowne informacije wo wotpadkowym hospodarstwje, adresy městnow, hdźež móžeš swoje dodźeržane elektriske nastroje wotbyć, kaž tež dalše adresy komunalnych a priwatnych přijimarnjow zelenych wotpadkow.