Za seminarne twarjenje w Małym Holešowje zběhanku swjećili

Mały Holešow (SN). Cyłkownemu přetwarej rybarskeho dwora w Małym Holešowje su minjeny pjatk wulki krok bliže přišli. Tón dźeń móžachu za nowe seminarne twarjenje Njeswačanskeje přirodoškitneje stacije zběhanku swjećić. Po dwěmaj lětomaj planowanja su w měrcu tohole lěta ze symboliskim prěnim zarywom twarske dźěła zahajili. Spočatk julija su studenća Drježdźanskeje techniskeje uniwersity twaršćizny stareho seminarneho twarjenja wottwarili, zo móhli je pozdźišo při twarje bróžnje znowa wužiwać. Mjez druhim zachowachu na te wašnje durje, wokna, špundowanje a izolowanski material. Kónc julija su skónčnje stare twarjenje dospołnje wottorhali. Při tym so hišće raz jeho špatna twarska substanca pokaza. Wot toho časa hłubokotwarska firma a ćěsliske předewzaće nowy centrum za wobswětowe kubłanje twarještej.