Stróža (SN/MWj). Do stareje wowčernje na dworje zarjadnistwa biosferoweho rezerwata Hornjołužiska hola a haty w Stróži zaćehnje zaso adwentna atmosfera. Mjeztym pjaty raz přeprošuja tam na zhromadne adwentne popołdnjo – lětsa samo na dwěmaj dnjomaj. Wopytowarjo a wobydlerjo móža so jutře, pjatk, wot 15 do 19 hodź. a sobotu, 16. decembra, wot 14 do 19 hodź. na regionalne wosebitosće, hudźbu, lěhwowy woheń a horce napoje wjeselić, zdźěli Meike Biskop ze zarjadnistwa biosferoweho rezerwata. Zarjadowanje přewjedu zhromadnje ze serbskim domizniskim towarstwom Radiška.
Na woběmaj dnjomaj poskićuja domjace chójny a šmrěki jako hodowne štomy. Nimo toho budu regionalne dźiwinowe a rybjace speciality na předań. Za dźěći a dorosćenych maja na woběmaj dnjomaj dohodowne paslenje a sobotu figurowe dźiwadło přihotowane. Sobotu wuklinči wječor wot 18.30 hodź. z klasiskimi a modernymi hodownymi spěwami spěwarki Anne Fox.
