Běły Chołmc (AK/SN). Po wosom měsacach twarskeho časa su wutoru w Běłym Chołmcu ponowjenu pěstowarnju „Sprjewine myški“ znowa poswjećili. Za dohromady 650 000 eurow je Łazowska gmejna špundowanja ponowiła a do nich tepjenje zatwariła, nowe wokna a durje zasadźiła kaž tež nowu elektriku, tepjenje a akustiske wjerchi zatwariła. Twarjenje bě něhdy Běłochołmčanska stara šula. Mjeztym 65 lět je w nim pěstowarnja zaměstnjena, rozłoži twarski nawoda Łazowskeje gmejny Jens Kiesch­nick. Nimo toho dyrbjachu 140 000 eurow za prowizoriske kontejnery wudać, w kotrychž su so za čas twarskich dźěłow wo žłobikarske a pěstowarske dźěći starali. Hižo při saněrowanju Wulkoždźarowskeje zakładneje šule su z kontejnerami dobre nazhonjenja zběrali.