Radźićeljo za Njeswačansku gmejnu nowe popłatki wobzamknyli

Njeswačidło (JK/SN). Na poslednje lětuše posedźenje je so Njeswačanska gmejnska rada nimale połnoličbnje wutoru wječor zetkała. Dnjowy porjad předwidźeše hłownje wuradźowanje wo nowych wustawkach wo popłatkach za wopłóčki za nowu hospodarsku dobu 2024 do 2027. K tomu předstaji zastupjer fachoweje firmy kalkulaciju, kotraž wobkedźbowaše dotalne a tuchwilne wudawki a kóšty za centralne kaž tež decentralne wotwožowanje.