Wojerecy (KD/SN). Wot lěta 2011 přetwarja Wojerowski zwěrjenc na tak mjenowany geozwěrjenc, zo móhli sej wopytowarjo zwěrjata rjadowane po kontinentach wobhladać. Dokelž su za to płoniny přikupili, zwoprawdźeja to z nowym masterowym planom. Tak chcedźa dotalny bydlenski dom Při haju na nowe hospodarske twarjenje zwěrjenca přetwarić a nowy wobłuk za wšitke zwěrjata z Azije wutworić, zdźěli wutoru jednaćel měšćanskeho zawoda za zwěrjenc, kulturu a kubłanje Arthur Kusber.

Wobaj projektaj je regionalny přewodźenski wuběrk pozitiwnje posudźował, tak zo maja nadźiju na spěchowanske srědki z fondsa za změnu strukturow. Po móžnosći 2024 maja so twarske dźěła zahajić. Aziski wobłuk ma po tuchwilnych wobličenjach 5,5 milionow eurow płaćić. Z toho ma měšćanski zawod 412 000 eurow swójskeho podźěla njesć. Za hospodarske twarjenje je 1,5 milionow eurow předwidźanych. Swójski podźěl měšćanskeho zawoda wučinja 130 000 eurow.