Dešno (dpa/SN). Drebom, orakl a ličba zboža dźewjeć – w Delnjej Łužicy je k hodam wjele ritualow. Hodowne swjate dny a wobradźenje w serbskim sydlenskim rumje trochu hinak swjeća hač w druhich kónčinach. Nawodnica delnjoserbskeho domizniskeho muzeja Babette Zenkerowa tele tradicije zachowa a so rady na swoje dźěćatstwo dopomina. Za Serbow maja hodowne dny a dny hač do 6. januara wulki wuznam.

Město hodowneho štoma mějachu ludźo w Delnjej Łužicy drebom. Eksemplary móža sej zajimcy w Dešnjanskim domizniskim muzeju wobhladać. Štom z němskim mjenom „Dreeboom“ ma wjacore schody. Tehdy njebě w kónčinje hišće telko jehlinowych štomow, Zenkerowa rozkładźe.