Informaciske zarjadowanje w Chrósćicach wulki zajim zbudźiło

Chrósćicy (JK/SN). To njeběchu organizatorojo a přistajeni Němskeho centruma za astrofyziku (DZA, oficialne serbske pomjenowanje: Astrocentrum Łužica) wočakowali: Stólcy na wulkej žurli wjacezaměroweje hale „Jednota“ w Chrósćicach njedosahachu. Wjac hač 450 zajimcow bě zbliska a zdaloka na informaciske zarjadowanje wo astrofyzice přichwatało. Přeprosyłoj stej sakske statne ministerstwo za wědomosć a DZA. Ludźo dožiwichu zajimawy a zabawny wječor, kotryž zaměr a bytosć astrofyziki w serbskej Łužicy spřistupni. Nimo toho zhonichu, kak chce so Sakska na směrodajne stejnišćo wědomosćow wuwić.

Zarjadowanje so direktnje do wjacorych wulkoměstow Němskeje a na kupu Norderney přenjese. K zazběhej zarjadowanja předstaji Magic-Andy z pomocu kuzłanja a magije na jara zabawne wašnje bytosć astrofyziki a žołmow. Při tym zapřija tež publikum a wosebje dźěći.