W Budyskim wokrjesu wola lětsa, 9. junija, nowy wokrjesny sejmik. Na wokrjesnym stronskim zjězdźe, přewjedźenym jako sobustawska zhromadźizna, je wokrjesny zwjazk CDU Budyšin sobotu w Połčnicy swoje kandidatki a swojich kandidatow nominował. Mjez nimi je wosom Serbowkow a Serbow.
Połčnica (SN/at). 93 žonow a muži nastupi za CDU w dźesać wólbnych wokrjesach k wólbam noweho Budyskeho wokrjesneho sejmika. Woni su na nominowanskim zarjadowanju předwčerawšim w Połčničanskej „Třělerni“ dowěru přitomnych křesćanskich demokratow dóstali. „Ličba nominowanych wosobow je nimale samsna kaž na minjenych wólbach sejmika před pjeć lětami“, wobkrući našej nowinje Marja Michałkowa, zastupowaca wokrjesna předsydka.
