Budyski wokrjes je wčera informaciju wo spěchowanju Sakskeje za dalši wutwar spěšneho interneta přijimał. Nětko su financy zaručene, dźěła za zwoprawdźenje móža zaměrnje pokročować.
Budyšin (SN/at). Na zakładźe „Programa šěre blaki“ Zwjazka za lěta 2023-2025 wokrjes Budyšin zastaranje ze spěšnym internetom we wjesnych kónčinach dale wudospołnja. K tomu je wokrjesny sejmik loni 4. decembra wobzamknył, trěbne wupisanje po cyłej Europje přihotować a wozjewić. Wuměnjenje za to su přizwolene spěchowanske srědki, wo kotrež je so wokrjes pola Zwjazka požadał.
Loni w oktobrje zapodate požadanje bě wuspěšne. Financna podpěra płaći za clusteraj 12 a 15, kotrejž mjenuje wobzamknjenje wokrjesneho sejmika mjez dohromady pjeć analyzowanymi clusterami prioritnej. Za dźěła w clusteru 12 přewozmje Zwjazk 60 procentow kóštow, za cluster 15 połojcu. Zbywacej sumje zaruči Sakska. Tohodla je sakski hospodarski minister Martin Dulig (SPD) přirjadnicy Budyskeho krajneho rady, dr. Romy Reinisch, wčera dwě přizwolenskej informaciji swobodneho stata přepodał.
