Z konwenta pčołarjow na česć Šěracha nowy ewent w Budyšinje wurostł

Budyšin (SN/at). W Budyšinje hotuja so na nowy event, na prěnje „Budyske mjedowe tydźenje“ wot 5. hač do 24. februara. Nastork k tomu je wurostł z konwenta pčołarstwa na česć 300. narodnin załožerja moderneho pčołarstwa Hadama Bohuchwała Šěracha. Tón budźe 17. a 18. februara w měšćanskej hali „Krónje“ (SN informowachu). Za tónle termin bě iniciator Šěrachoweho lěta 2023/2024, bywši Malešanski wjesnjanosta Günter Sodan, hižo při lońšim wopominanju składnostnje 250. posmjertnin fararja w Budyšinku wabił.

Jako mějićelka „Króny“ spyta Budyske bydlenjotwarske towarstwo (BWB) zarjadowanja podpěrować, kotrež so w měšćanskej hali wotměwaja. „W minjenymaj lětomaj smy hižo ,tydźenje šacha‘ organizowali“, wuswětli jednaćelka BWB, Kirsten Schönherr, tute budu lětsa mjeztym třeći raz. Po samsnym modelu zrodźichu mysl z mjedom a wobroćichu so z njej na Renéja Schiebacka z Droždźija.